63
野藤唔好乱来缠
妹系梨木唔系柴，任你有钱也难买。
皇帝拿来做案桌，文武官员唔咐挨。
你要连涯有咐易，一要问过涯爷嫫。
二要问过涯叔伯，妹也还要想过来。
爱妹姻缘有坩易，一要海水戽干来。
二是日头西边出，三要月光跌下来。
绸缎唔晒破竹篙，花兰唔装蕃薯苗。
凤凰唔同乌鸦嬲，画眉唔同屎缸鸟。
狂狗唔好乱吠天，凡人唔好乱惹仙。
妹系月中桂花树，野藤唔好乱来缠。
鸡仔走入鸭仔笼，讲来讲去话唔通。
两家面目不一样，样般好来结成双。
你想同涯结鸳鸯，石壁牵牛过崖上。
你想同涯结双对，唔当上天取月光。
妹子好比草花蛇，谁人伸手敢来拿。
涯今好比皇帝女，谁人敢贪这枝花。
妹子好比草花蛇，涯今伸手就敢拿。
新科状元涯中到，皇帝招涯当驸马。
一一一一
64
蒸酒有酿枉劳神
你做你来涯做涯，各人打酒各人筛。
花布拿来做衫着，长短宽狭各人裁。
靓面搓粉做嫩饺。箭射飞鹅铁精刁。
菜刀生锈系铁坏，纸莺断线情难交。
坏铁拿来做秤钩，秤有几久就断腰。
连妹莫连有情妹，行有几久就断桥。
莳田莫莳田壁下，唔系石头就系沙。
连妹莫连多嘴婆，免得相吵结冤家。
斑鸠飞入画眉笼，画眉唔系唔敢同。
唔系自家心肝肉，心里敢想唔敢动。
着双屐子上楼梯，唔怕跌死行前来。
你想讲笑就易得，你想前身后世来。
有情妹子唔好交，风吹禾叶两面刀。
今日有钱同你好，一下有钱面都敖。
癞蛤蟆来想上天，好脚唔要烂布缠。
妹子人穷有志气，唔爱你叽冤孽钱。
有情妹子唔好交，蒸酒有酿枉神劳。
麦须磨粉有面见，蕉叶盖屋唔当茅。
水打石头堆打堆，你莫紧行紧前来。
猫公进屋灶里睡，唔好碰到一鼻灰。
花钵肚里种细茶，淋哩一次有生芽。
淋哩二次有生日，到底唔知哪样差。
当初差来自家差，黄荆当作嫩细茶。
一心留来长久泡，谁知一泡右翻渣。
晒谷落水加早收，有情妹子就爱丢。
下田捡来田螺食，无端捡到气来抽。
（根据九峰山歌代表传承人罗家茂先生手抄本整理2017.10.14）
一一一一 |
