男:
讲唱山歌有问题,随时可以应付你。
金丝猫公唔怕鼠,豆腐上箱面大哩。
女:
豆腐上箱面大哩,山歌师傅到来哩。
前年抽签来拜神,涯爱老神正可以。
男:
涯爱老神正可以,老妹唔使咐谦虚。
北乡马蹄甜又爽,讲话唔离北乡语。
女:
讲话唔离北乡语,铜坑姑娘难得哩。
当街捡到当街卖,唔曾捡到口水尾。
男:
水淋石灰化了哩,耙头晒衫铁叉衣。
冷锅煮饭有气来,虫蛀担竿断定哩。
女:
虫蛀担竿断定哩,路远迢迢来寻你。
有情唔怕路途远,有情枉费两隔离。
男:
有情枉费两隔离,阿妹心事哥也知。
阿哥好比梁山伯,你莫作涯陈世美。
女:
你莫作涯陈世美,三餐唔食因为你。
拿起筷子来扒饭,想起亲哥就饱哩。
男:
想起亲哥就饱哩,细声细气安慰你。
花开自有结子日,蔗杆自然甜到尾。
女:
蔗杆自然甜到尾,满园柑子垂断枝。
打开园口斜眼看,想你结缘急坏哩。
男:
想你结缘急坏哩,劝妹耐心等一时。
脱脚方台莫斗紧,月缺自有月圆时。
女:
月缺自有月圆时,你爱涯来涯爱你。
交情如同长江水,只有东流不向西。
男:
只有东流不向西,生莫分开死莫离。
猪肝心俐煮一碗,全副心肝招待你。
女:
全副心肝招待你,有心对涯涯也知。
半箩粗糠半箩米,老妹为你做出哩。
男:
老妹为你做出哩,青藤到尾缠到树。
莫学竹头年年老,要学甘蔗甜到尾。
女;
要学甘蔗甜到尾,口想你来夜想你。
挂念父母有隔日,挂念亲哥在心里。
男:
挂念亲哥在心里,阿妹真心哥也知。
蜘蛛结网三江口,永打不断系真丝。
合:
两人相好要到尾,山歌紧唱’隋紧痴。
今日同妹有唱够,下日来唱再约你。
一一一一2017.10.25
|